निगरानी न्युज ।
खेलको अन्त्यतिर तीन गोल फर्काएपछि म्यान्चेस्टर युनाइटेडले न्युकासल युनाइटेडमाथि ४(१ गोलअन्तरको जित हासिल गरेको छ । पछिल्लो लिग खेलमा टोटनह्यामसँग ठूलो अन्तरको पराजयपछि संकटमा परेको म्यानचेस्टरका लागि यो जित राहत हुनेछ ।
खेलको अन्तिम केहि मिनेटमात्र बाँकी रहँदा खेल बराबरीतर्फ उन्मुख थियो । ५८ औं मिनेटमा बुर्नो फर्नान्डेजले पेनाल्टीमा गोल गर्न नसक्दा म्यानचेस्टर तीन अंक हासिल गर्न नसक्ने स्थितिमा थियो ।
लुक शले दोस्रो मिनेटमै आत्मघाती गोल गर्दा पछि परेको म्यानचेस्टरका लागि २३ औं मिनेटमा ह्यारी मगायरले गोल गरी खेल बराबरीमा ल्याएका थिए ।
८६औं मिनेटमा फर्नान्डेजले गोल गरेपछि खेल एकाएक म्यानचेस्टरको पक्षमा पुग्यो । ९० औं मिनेटमा वान बिसाका र इन्ज्यूरी समयको अन्तिम मिनेटमा मार्को रासफोर्डले गोल गरी ४(१ को सम्मानित जित दिलाए ।
म्यानचेस्टरको यो चौथो खेलमा दोस्रो जित हो ।
